រាជធានីភ្នំពេញ៖ ប្រជាពលរដ្ឋ បានថ្លែងប្រាប់ថា កាលពីព្រលប់ថ្ងៃទី៨ ខែធ្នូ ឆ្នាំ២០២០ បានឃើញសមត្ថកិច្ចជាច្រើននាក់ ចុះទៅទីតាំងផ្ទះជួល៦ល្វែង ស្ថិតនៅតាមផ្លូវបេតុង ភូមិខ្មែរលើ សង្កាត់គោករកា ខណ្ឌព្រែកព្នៅ ដែលសង្ស័យថា បានបើកល្បែងស៊ីសងដ៏ធំ របស់ឈ្មោះ សូ សំឡូត ។
ដើម្បីចង់ដឹងច្បាស់ពីរឿងនេះ បន្ថែមទៀត នៅព្រឹកថ្ងៃទី៩ ខែធ្នូ ឆ្នាំ២០២០ អ្នកសារព័ត៌មាន បានទំនាក់ទំនងទៅលោកវរសេនីយ៍ឯក ឈិន គឹមធុយ អធិការនគរបាលខណ្ឌព្រែកព្នៅ តែលោកអធិការឆ្លើយតបទាំងសម្តីគ្រោតគ្រាត និង មិនសប្បាយចិត្ត ថា «ខ្ញុំចេះធ្វើការរឿងនេះហើយ» រួចក៏ចុចបិទទូរស័ព្ទភ្លាមៗ ។
ឥរិយាបថរបស់លោកអធិការនគរបាលខណ្ឌព្រែកព្នៅ នាពេលនេះ ហាក់មិនសប្បាយចិត្តទាល់តែសោះ ដោយមិនដឹងមូលហេតុ អ្វី ។ ជាធម្មតា ការបង្ក្រាបបទល្មើស សមត្ថកិច្ចគួរបង្ហាញ ដើម្បីជាស្នាដៃ ជូនថ្នាក់លើ តែបែរជាលោកអធិការ មិនសប្បាយចិត្ត និង ឆ្លើយតប ទាំងសម្តីគ្រោតគ្រាត មកលើអ្នកសារព័ត៌មាន ទៅវិញ ។
បញ្ហានេះ អ្នកសារព័ត៌មាន សូមសំណូមពរដល់លោកឧត្តមសេនីយ៍ឯក ស ថេត អគ្គស្នងការរងនិងជាស្នងការនគរបាលរាជធានីភ្នំពេញ មេត្តាជួយពិនិត្យមើលឥរិយាបថការងាររបស់លោកអធិការខណ្ឌព្រែកព្នៅ ផង ហេតុអ្វី មិនសប្បាយចិត្ត ពេលអ្នកសារព័ត៌មាន សួរព័ត៌មាន ពីការចុះបង្ក្រាបទីតាំងល្បែងស៊ីសង ទៅវិញ ឬ ក៏ ទីតាំងល្បែងនេះ អាចជាឆ្នាំងបាយរបស់លោកអធិការ ? ។
សមត្ថកិច្ច បានចុះទៅទីតាំងមួយនេះ ក្រោយពី អ្នកសារព័ត៌មាន បានចេញផ្សាយនូវព័ត៌មាន មួយ ដែលមានចំណងជើង ថា «ល្បែងស៊ីសងលុយរាប់ពាន់ដុល្លារ ជួលផ្ទះដល់ទៅ៦ល្វែង របស់ឈ្មោះ សូ សំឡូត កំពុងដំណើរការយ៉ាងរលូន នៅខណ្ឌព្រែកព្នៅ»។
តាមប្រភពព័ត៌មានពីសាច់ញាតិអ្នកញៀនល្បែងស៊ីសង បានបង្ហើបប្រាប់ថា ផ្ទះជួលដល់ទៅ៦ល្វែង ស្ថិតនៅតាមផ្លូវបេតុង ភូមិខ្មែរលើ សង្កាត់គោករកា ខណ្ឌព្រែកព្នៅ រាជធានីភ្នំពេញ របស់ឈ្មោះ សូ សំឡូត ជាមេល្បែងដ៏ល្បីល្បាញ កំពុងដំណើរការយ៉ាងរលូន ដោយមិនទាន់ឃើញសមត្ថកិច្ចចុះបង្ក្រាប នៅឡើយទេ ។
ទីតាំងមួយនេះ ត្រូវបានប្រភពព័ត៌មានបង្ហើបប្រាប់ថា មានធ្វើរបងដែកពីខាងក្រៅ ដោយអនុញ្ញាតអោយអ្នកលេងចូលដាក់ឡាននិងម៉ូតូ នៅក្រៅក្នុង ដោយបន្លំភ្នែកសមត្ថកិច្ច ធ្វើដូចជាស្ងប់ស្ងាត់ណាស់ ។ ប៉ុន្តែ ខាងក្នុងវិញ គឺ កំពុងលេងល្បែងយ៉ាងគគ្រឹកគ្រេង ។ ជាមួយគ្នានេះ ក៏មានការបែកធ្លាយរូបភាពលេងល្បែងស៊ីពីខាងក្នុងនោះ ផងដែរ ។
ឈ្មោះ សូ សំឡូត ជាមេល្បែងដ៏ល្បីល្បាញ លើកមុនធ្លាប់បើកទីតាំងល្បែងនៅចំណុចក្នុងបុរីសុភមង្គលភ្នំពេញ ព្រែកលៀប ខណ្ឌជ្រោយចង្វារ តែពេលនេះ បានប្តូរទីតាំងមកផ្ទះជួលដល់ទៅ៦ល្វែង ស្ថិតនៅតាមផ្លូវបេតុង ភូមិខ្មែរលើ សង្កាត់គោករកា ខណ្ឌព្រែកព្នៅ វិញ ។
ជុំវិញបញ្ហានេះ លោកវរសេនីយឯក ឈិន គឹមធុយ អធិការនគរបាលខណ្ឌព្រែកព្នៅ ថ្លែងប្រាប់កាលពីរសៀលថ្ងៃទី៨ ខែធ្នូ ឆ្នាំ២០២០ នេះ ថា លោកមិនបានដឹងបញ្ហាល្បែងស៊ីសង នេះទេ ដោយសារថ្នាក់ក្រោមមិនបានរាយការណ៍ ។ ប៉ុន្តែ លោកអធិការ បន្តថា លោកនឹងមានវិធានការ ចំពោះបញ្ហានេះ ៕ ប្រភពពី CPC News