រថយន្ត២គ្រឿងព្រលះគ្នាលាន់ដូចរន្ទះបណ្ដាលឲ្យអ្នកបើកបររថយន្តម៉ាក High lander ស្លា ប់បាត់បង់ជីវិត

ភ្នំពេញ៖) បុរសតៃកុងរថយន្ត High lander ម្នាក់ឬបានស្លាប់បាត់បង់ជីវិតយ៉ាងអាណោចអាធ័មនៅក្នុងថ្លុកឈាមក្រោយពេលកំពុងបើកឆ្លងកាត់ផ្លូវបំបែកជាបួនបុកគ្នាពេញទំហឹងជាមួយនិងរថយន្តសង្គ្រោះបន្ទាន់របស់ក្រសួងសុខាភិបាលរាជធានីភ្នំពេញ ។

ហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយនេះបានកើតឡើងកាលពីវេលាម៉ោង១១នឹង២០នាទីយប់ ថ្ងៃទី២០ ខែកញ្ញា ឆ្នាំ២០២១ ស្ថិតតាមបណ្ដោយផ្លូវ ២០០៤ ត្រង់ចំណុចនឹងស្តុបវត្តអង្គតាមិញ ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

ជនរងគ្រោះមាន ឈ្មោះ ពេច សារ៉ាយ ភេទប្រុស អាយុ៤៣ មុខរបរជាមន្ត្រីយោធា ស្នាក់នៅម្ដុំព្រែកតាម៉ាក់ ស្រុកខ្សាច់កណ្ដាល ខេត្តកណ្ដាល(ស្លា ប់)

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលហេតុការណ៍នេះបានកើតឡើងគេបានឃើញរថយន្តសង្គ្រោះបន្ទាន់របស់ក្រសួងសុខាភិបាលរាជធានីភ្នំពេញមួយគ្រឿងបើកបរទិសដៅពីលិចទៅកើតក្នុងល្បឿនលឿន ខណៈពេលមកដល់ត្រង់ចំណុចកើតហេតុខាងលើ ក៏ស្រាប់តែមានបុរសម្នាក់ដែលមានពាក់ខោអាវជាឯកសណ្ឋានមន្ត្រីយោធាបើករថយន្តម៉ាក High lander ពណ៍ទឹកប៊ិចមួយគ្រឿងពាក់ស្លាកលេខភ្នំពេញ2X-4505 បើកបរក្នុងទិសដៅពីជើងទៅត្បូង មានស្ថានភាពលឿនដូចគ្នាឆ្លងកាត់ភ្លើងស្តុបមិនប្រយ័ត្ន បុកគ្នាពេញទំហឹងជាមួយនឹងរថយន្តសង្គ្រោះបន្ទាន់របស់ក្រសួងសុខាភិបាលរាជធានីភ្នំពេញ ផ្លោងខ្ទៀតទៅបោកជាមួយនឹងបង្គោលភ្លើងក្រឡាប់ផ្ងារជើងគៀបជាប់អ្នកបើករថយន្ត High lander រងរបួសយ៉ាងធ្ងន់ធ្ងរ ហើយត្រូវបានស្លា ប់បាត់បង់ជីវិតទៅវិញក្រោយពេលបញ្ជូនទៅសង្គ្រោះបន្ទាន់នៅឯមន្ទីរពេទ្យ។

ក្រោយកើតហេតុសមត្ថកិច្ចមូលដ្ឋានក៏បានចុះមកដល់ទីតាំងកើតហេតុនោះភ្លាមដើម្បីត្រួតពិនិត្យមើលរួចរាល់នោះក៏បានទាក់ទងទៅផ្នែកជំនាញឲ្យព្យុះមុខធ្វើការវាស់វែងនិងយករថយន្តទាំង២គ្រឿងទៅរក្សាទុកនៅឯចរាចរណ៍ផ្លូវគោក នៃការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នានៅពេលក្រោយ។

ចំណែកសាកសពសមត្ថកិច្ចធ្វើកំណត់ហេតុនិងកុសលវិច្ច័យរួចរាល់ក៏បានប្រគល់ទៅឲ្យសាច់ញាតិនិងក្រុមគ្រួសារយកទៅធ្វើបុណ្យតាមប្រពៃណី។រក្សាសិទ្ធិ៖)ដោយវុត្ថា