សមត្ថកិច្ចនាំខ្លួនម្តាយតារាចម្រៀង ពេជ្រ សូលិកា ទៅធ្វើត្រាប់ពីសកម្មភាពសម្លាប់ស្ត្រី​ភេទ​ទីបី​ម្នាក់ ក្នុងបុរីវីឡាថោន

ភ្នំពេញ៖ កាលពីព្រឹកថ្ងៃទី១៣ ខែមករា ឆ្នាំ២០២០ កម្លាំងនគរបាលនៃអធិការដ្ឋានខណ្ឌមានជ័យ បាននាំខ្លួនម្តាយតារាចម្រៀង ពេជ្រ សូលិកា ទៅធ្វើត្រាប់ពីសកម្មភាពសម្លាប់ស្ត្រី​ភេទ​ទីបី​ម្នាក់ ក្នុងបុរីវីឡាថោន ។

ជនសង្ស័យមានឈ្មោះ ស៊ិន ស្រីនាង ភេទស្រី អាយុ៤៥ឆ្នាំជនជាតិខ្មែរ មានទីលំនៅផ្ទះលេខL42A ផ្លូវលេខV16A ( បុរីវីឡាថោន) ក្នុងសង្កាត់ចាក់អង្រែក្រោម ខណ្ឌមានជ័យ ត្រូវបានសមត្ថកិច្ចឃាត់ខ្លួនពាក់ព័ន្ធនិងករណីអំពើឃាតកម្ម ទៅលើស្ត្រីភេទទីបីម្នាក់ ( ជនសង្ស័យ និងជនរងគ្រោះមានទំនាក់ទំនងស្រលាញ់ស្រីដូចគ្នា ) ។ ប្រភពព័ត៌មានបង្ហើបឲ្យដឹងថា ជនសង្ស័យជាម្តាយរបស់តារាចម្រៀងល្បីឈ្មោះ ពេជ្រ សូលិកា ។ រីឯជនរងគ្រោះមានឈ្មោះ ងិន សុខលី ភេទស្រីអាយុ៥០ឆ្នាំ ទីលំនៅផ្ទះលេខ59 ផ្លូវលេខ134 សង្កាត់ផ្សារដេប៉ូ2 ខណ្ឌទួលគោក មុខរបរលក់កាហ្វេនៅក្នុងផ្សារដេប៉ូ ។ សម្ភារៈបាត់បង់ ៖ ចិញ្ចៀនពេជ្រចំនួន០២វង់(០១វង់មានដាំពេជ្រធំល្មមចំនួន០៣គ្រាប់និង០១វង់ទៀតមានដាំពេជ្រតូចៗចំនួន០៣ជួរ ) ។

ប្រភពព័ត៌មានបានឲ្យដឹងទៀតថា កាលពីថ្ងៃទី១១ ខែមករា ឆ្នាំ២០២០ វេលាម៉ោង២២៖០០នាទី ជនរងគ្រោះបានជិះម៉ូតូ០១គ្រឿងម៉ាកសេ១២៥ ពណ៌ខ្មៅម្នាក់ឯងទៅលេងផ្ទះជនសង្ស័យ( បុរីវីឡាថោន ) សង្កាត់ចាក់អង្រែក្រោម ខណ្ឌមានជ័យ ។ ជនសង្ស័យក៏បានឃើញជនរងគ្រោះពុំមានពាក់ចិញ្ចៀនពេជ្រទាំង០២វង់ដូចធម្មតាដែលខ្លួនទិញអោយ ទើបកើតចិត្តខឹងប្រច័ណ្ឌ (ដោយដឹងថា ជនរងគ្រោះមានទំនាក់ទំនងជាមួយស្រីផ្សេងទៀត) ជនសង្ស័យក៏បានទារលុយចំនួន១៥០០០ដុល្លារដែលយកទៅរកស៊ីចងការពីជនរងគ្រោះមកវិញ តែជនរងគ្រោះមិនព្រមអោយក៏មានទំនាស់វាយប្រតាយប្រតប់គ្នា ខណៈនោះជនរងគ្រោះមានអាការៈទន់ដៃជើងដូចមនុស្សស្រវឹងស្រា ហើយជនសង្ស័យបានយកខ្សែអាវធ្វើពីក្រណាត់ចំនួន០១ខ្សែមកចងដៃជនរងគ្រោះទៅក្រោយ ហើយចាប់ក្បាលសង្កត់មុខផ្ទប់ជាមួយខ្នើយកើយរហូតថប់ដង្ហើមស្លាប់ ទើបជនសង្ស័យបានស្រាយខ្សែដៃជនរងគ្រោះ រួចរៀបចំដាក់សពឲ្យដេកដូចមនុស្សធម្មតា ។

លុះដល់ថ្ងៃទី១២ ខែមករា ឆ្នាំ២០២០ វេលាម៉ោង១៣៖៤០នាទី ទើបជនសង្ស័យបានឲ្យក្រុមគ្រួសារមករាយការណ៍ប្រាប់នគរបាលប៉ុស្តិ៍ចាក់អង្រែក្រោម ពីរឿងជនរងគ្រោះបានស្លាប់ក្នុងផ្ទះរបស់ខ្លួន ។ បន្ទាប់មកកម្លាំងនគរបាលបច្ចេកទេសវិទ្យាសាស្រ្ត នៃស្នងការដ្ឋាននគរបាលរាជធានីភ្នំពេញ និង លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យរាជធានីភ្នំពេញ បានចុះធ្វើកោសល្យវិច័យលើសពជនរងគ្រោះ ឃើញមានស្នាមចងដៃទាំងសងខាងបណ្តាលឲ្យដាច់រលាត់ស្បែក និង មានស្នាមដាច់រលាត់ស្បែកក្រោមភ្នែកទាំងសងខាងហើយសពស្លាប់ដោយសារខ្ទប់ផ្លូវដង្ហើម។

បន្ទាប់ពីធ្វើកោសល្យវិច័យ សមត្ថកិច្ចមានការសង្ស័យទៅលើឈ្មោះ ស៊ិន ស្រីនាង(ជនសង្ស័យ) ក៏បាននាំខ្លួនយកទៅសាកសួរនៅស្នាក់ការនគរបាលប៉ុស្តិ៍ចាក់អង្រែក្រោម តែជនសង្ស័យឈ្មោះ ស៊ិន ស្រីនាង បានព្យាយាមឆ្លើយភូតកុហក់អស់រយៈពេលយ៉ាងយូរទើបជនសង្ស័យព្រមឆ្លើយសារភាពថា រូបគាត់ពិតជាបានសម្លាប់ជនរងគ្រោះឈ្មោះ ងិន សុខលី ពិតប្រាកដមែន ៕crnnews