ខេត្តបាត់ដំបង÷ ហ្វេសប៊ុកឈ្មោះ “អធិរាជ មហាសាច់” ដែលគេស្គាល់ថាជាសកម្មជនហ្វេសប៊ុករបស់ឯកឧត្តម ព្រំ សាន ដែលតែងតែបង្ហោះព័ត៌មានវាយប្រហារ និងជាន់ពន្លិច គេឯងតាមបណ្ដាញសង្គម ជារេីយៗ ដោយគ្មានមូលដ្ឋានច្បាស់លាស់ និយាយអោយតែបាន និងតែងតែជេបញ្ជោរគេឯងតាមអំពេីចិត្ត ជាពិសេសទម្លាប់ផុសវាយប្រហារ និងជាន់ពន្លិចមន្ត្រីពុករលួយតាមបណ្ដាញសង្គម ក្រែងធ្លាក់លុយខ្លះបិតមាត់ខ្លះ តែបើផុសវាយប្រហារមន្ត្រីស្អាតស្អំ សូម្បីតែលុយផឹកទឹកតែក៏គ្មានផង សូមជ្រាប ហេីយជាក់ស្ដែងពេលនេះ ស្នងការដ្ឋាននគរបាលខេត្តបាត់ដំបង ក៏សម្រេចចិត្តដាក់ពាក់បណ្ដឹង នៅសាលាដំបូងខេត្តបាត់ដំបងហេីយ ពាក់ព័ន្ធនឹងករណី ឡាយ(live)ជេរប្រមាថយ៉ាងធ្ងន់ធ្ងរ ដល់សមត្ថកិច្ចអនុវត្តន៍ច្បាប់ផ្នែកចរាចរណ៍ នៃស្នងការខេត្តបាត់ដំបងដែលមិនអាចទទួលយកបាន និងធ្វើឲ្យប៉ះពាល់កិត្តិយសសេចក្ដីថ្លៃថ្នូររបស់សមត្ថកិច្ច នៃស្នងការខេត្តទាំងមូល និងធ្វើឲ្យមតិមហាជន ក៏ដូចជាប្រជាពលរដ្ឋយល់ច្រឡំ និងអស់ទឹកចិត្តលើសមត្ថកិច្ចដែលបាននិងកំពុងបម្រើដល់សន្តិសុខសាធារណៈបានយ៉ាងល្អប្រសើរកន្លងមក ក៏ដូចជាបច្ចុប្បន្ន ជាពិសេសក៏ត្រូវបានបំពេញភារកិច្ចយ៉ាងតឹងរ៉ឹងចំពោះថ្នាក់ដឹកនាំប្រគល់ឲ្យដើម្បីអនុវត្តន៍ដោយឈរលើគោលនយោបាយដ៏ត្រឹមត្រូវរបស់រាជរដ្ឋាភិបាលផងដែរ។
យោងតាមពាក្យបណ្ដឹងនេះមាន លោក ប៉ែន រិទ្ធី ស្នងការរងទទួលផែនការងារសណ្ដាប់ធ្នាប់ នៃស្នងការខេត្តបាត់ដំបងជាដើមបណ្តឹង និងជានីតិបុគ្គលតំណាងឲ្យស្នងការខេត្តផងដែរ។ ពាក្យបណ្ដឹងខាងលើនេះដែរ ស្នងការនគរបាលខេត្ត បានធ្វើឡើងក្រោយពីក្រុមការងារប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង បានធ្វើការបកស្រាយ និងជម្រាបជូនដល់សាធារណជនទៅលើករណីដែលម្ចាស់គណនីហ្វេសប៊ុកឈ្មោះអធិរាជមហាសាច់ បានឡាយ(live)ជេរប្រមាថយ៉ាងធ្ងន់ធ្ងរមកលើសមត្ថកិច្ចជាសាធារណៈ តាមបណ្តាញសង្គមកន្លងទៅថ្មីៗនេះ។
នៅក្នុងខ្លឹមសារដែលក្រុមការងារប្រតិកម្មរហ័ស នៃស្នងការខេត្ត បានធ្វើការស្រាយបំភ្លឺដល់សាធារណជន បានសរសេរថា សូមជម្រាបជូនសាធារណជន ពិសេសអ្នកនិយមប្រើប្រាស់បណ្តាញសង្គមបានជ្រាបថា នៅរសៀលថ្ងៃទី០៤ ខែកុម្ភៈ ឆ្នាំ២០១៩ មានម្ចាស់គណនីហ្វេសប៊ុកឈ្មោះ(អធិរាជមហាសាច់) បានផ្សាយផ្ទាល់(Live)រូបភាព និងសំឡេង ដោយធ្វើការជេរប្រមាថយ៉ាងធ្ងន់ធ្ងរដល់សមត្ថកិច្ចនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តបាត់ដំបង ដែលកំពុងបំពេញភារកិច្ចនៅលើដងផ្លូវសាធារណៈក្នុងគណៈកម្មាធិការសុវត្ថិភាពចរាចរណ៍ផ្លូវគោកខេត្តបាត់ដំបង ស្របតាមច្បាប់តួនាទី និងភារកិច្ចរបស់ខ្លួន។
ខ្លឹមសារដដែលបន្តថា ការបំពេញភារកិច្ចរបស់មន្ត្រីនគរបាលចរាចរណ៍ត្រូវតែអនុវត្តស្របទៅតាមច្បាប់ដែលបានចែង និងបទដ្ឋានគតិយុត្តិនានាដែលបានកំណត់ដោយគ្មានការលើកលែង និងយោគយល់បានឡើយ ចំពោះអ្នកប្រព្រឹត្តិខុសច្បាប់។
ខ្លឹមសារបានបន្តថា ករណីអ្នកបើកបរ(គ្មានប័ណ្ណបើកបរ)ត្រូវទទួលការពិន័យអន្តរការណ៍ស្របតាមមាត្រា១០ នៃអនុក្រឹត្យលេខ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧ របស់រាជរដ្ឋាភិបាល នៃព្រះរាជាណាចក្រកម្ពុជា។
ខ្លឹមសារដដែលសង្កត់ធ្ងន់ថា សកម្មភាពរបស់ម្ចាស់គណនីហ្វេសប៊ុកខាងលើមានចេតនាគាំទ្រយ៉ាងពេញទំហឹង និងកំពុងលើកទឹកចិត្តចំពោះអ្នកប្រព្រឹត្តិផ្ទុយពីច្បាប់ ស្តីពីចរាចរណ៍ផ្លូវគោក នៃព្រះរាជាណាចក្រកម្ពុជា ក្រៅពីនេះសកម្មភាពរបស់ម្ចាស់គណនីហ្វេសប៊ុកខាងលើ បានប្រព្រឹត្តិផ្ទុយយ៉ាងជាក់ស្ដែងនឹងជំពូកទី៤ មាត្រា៥០២ ក្រមព្រហ្មទណ្ឌ នៃព្រះរាជាណាចក្រកម្ពុជា ដែលមានចែងពីការជេរប្រមាថ និងការប្រឆាំងនឹងអ្នករាជការសាធារណៈ ហើយអំពើនេះ ត្រូវទទួលនូវការទោសព្រហ្មទណ្ឌផងដែរ ចំពោះអ្នកប្រព្រឹត្តិ។ សកម្មភាពជេរប្រមាថមាក់ងាយចំពោះមន្ត្រីនគរបាលជាតិជាសាធារណៈបែបនេះ យើងមិនអាចទទួលយកបានឡើយ នៅពេលនេះ ថ្នាក់ដឹកនាំស្នងការ នៃស្នងការដ្ឋាននគរបាលខេត្តបាត់ដំបង កំពុងពិនិត្យ និងពិចារណាអំពីវិធានការខាងផ្លូវច្បាប់ចំពោះទង្វើ និងសកម្មភាពខុសឆ្គងរបស់ម្ចាស់គណនីហ្វេសប៊ុកខាងលើហើយ។
ខ្លឹមសារដដែលក៏បានបញ្ជាក់បន្តថា រដ្ឋធម្មនុញ្ញ នៃព្រះរាជាណាចក្រកម្ពុជា មាត្រា៣១ បានចែងអំពីសិទ្ធិ និងករណីកិច្ចរបស់ប្រជាពលរដ្ឋខ្មែរ ដែលក្នុងនោះប្រជាពលរដ្ឋខ្មែរមានភាពស្មើគ្នាចំពោះមុខច្បាប់ ការប្រើសិទ្ធិសេរីភាពផ្ទាល់ខ្លួនរបស់បុគ្គលម្នាក់ៗ មិនត្រូវឲ្យប៉ះពាល់សិទ្ធិសេរីភាពអ្នកដទៃឡើយ ការប្រើសិទ្ធិសេរីភាពនេះ ត្រូវប្រព្រឹត្តិតាមលក្ខខ័ណ្ឌកំណត់ក្នុងច្បាប់ ដូច្នេះសូមបងប្អូនប្រជាពលរដ្ឋ មេត្តាចូលរួមគោរពច្បាប់ទាំងអស់គ្នាដោយសេចក្តីគោរព និងភាតរភាពបំផុត៕
រដ្ឋមន្រ្ដីក្រសួងព័ត៌មាន បានអះអាងថា ការបង្ហោះព័ត៌មាននៅលើ Facebook មិនត្រូវបានច្បាប់ការពារនោះទេ ខណៈដែលមានអ្នកលេង Facebook មួយចំនួនតាំងខ្លួនជាអ្នកសារព័ត៌មាន ហើយធ្វើការបង្ហោះចែកចាយ ផ្សព្វផ្សាយ ដំណឹងមិនច្បាស់លាស់តាមតែអំពើចិត្ត។
លោក ខៀវ កាញារីទ្ធ រដ្ឋមន្រ្តីក្រសួង មានប្រសាសន៍ថា ការបង្ហោះ ការអត្ថាធិប្បាយ និងចែកចាយព័ត៌មាននៅលើបណ្តាញសង្គម Facebook មិនមែនជាការផ្សាយព័ត៌មាន ដែលត្រូវការពារដោយច្បាប់ ស្តីពីរបបសារព័ត៌មាននោះទេ ប៉ុន្ដែអ្នកសារព័ត៌មាន តាមទូរទស្សន៍ តាមវិទ្យុ កាសែត និងសារព័ត៌មាន Online គឺមានការពារដោយច្បាប់របបសារព័ត៌មានជាធរមាន។ ការអះអាងនេះ បន្ទាប់ពីឧត្តមក្រុមប្រឹក្សាពិគ្រោះ និងផ្តល់យោបល់ បានបង្ហាញការងឿយឆ្ងល់ នៅពេលដែលអ្នកលេង Facebook មួយចំនួនតាំងខ្លួនជាអ្នកសារព័ត៌មាន ហើយធ្វើការបង្ហោះចែកចាយ ផ្សព្វផ្សាយ ដំណឹងមិនច្បាស់លាស់តាមតែអំពើចិត្ត។
ជាមួយគ្នានេះ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានណែនាំដល់អ្នកលេង Facebook ត្រូវគិតពេលបញ្ចេញមតិ ត្រូវមានការទទួលខុសត្រូវមួយ រាល់ការបង្ហោះប៉ះពាល់សិទ្ធអ្នកដទៃ៕
